Meer Hasan

dildar dil is tarah baham aae nazar mein

Meer Hasan

Delhi, India

1717-1786

dildār dil is tarah baham aa.e nazar meñ

jis tarah guhar aab meñ aur aab guhar meñ

ik baar bhī dekhā na use paas se kar

aayā nazar vo to kahīñ rāhguzar meñ

har-chand ki hai shām-o-sahar vo par us bin

vo lutf na ab shaam meñ hai aur na sahar meñ

qismat se madad chāhtā huuñ itnī ki har vaqt

mānind-e-sabā saath rahūñ us ke safar meñ

ik baar to naale ho ruḳhsat hameñ sayyād

pinhāñ rakheñ ham kab ta.iiñ fariyād jigar meñ

hosh-o-ḳhirad-o-sabr-o-tavāñ uTh chale ik ek

jaate tire chaal paḌī dil ke nagar meñ

kīdhar ko nikal jāveñ 'hasan' kyā kareñ ham aah

bāhar ye dil apnā na lagtā hai na ghar meñ

Top Urdushayar.com