kahīñ jo dil na lagāveñ to phir udaas phireñ
vagar lagāveñ to mushkil ki be-havās phireñ
hameñ bhī hove ijāzat ki sham.a-rū tujh par
patañg kī namat ik dam tū ās-pās phireñ
tirī galī meñ bhalā itnī to hameñ ho raah
ki jab tak apnā vahāñ jī ho be-hirās phireñ
uThā de ham se jo baiThe ho.uuñ ko ab kī falak
to aarzū hai ye jī meñ ki be-qayās phireñ
na ḳhat kisī kā paḌhe hai 'hasan' na vo arzī
kahāñ talak liye ham apnā iltimās phireñ