duur se bāġh-e-jahāñ dikhlā ke dīvāna kiyā
muttasil jaane na paayā maiñ ki vīrāna kiyā
dekhte hī mai ko sāġhar kā na kheñchā intizār
maare jaldī ke maiñ apnā haath paimāna kiyā
Turfa-tar ye hai ki apnā bhī na jaanā aur yūñhī
apnā apnā kah ke mujh ko sab se begāna kiyā
kuchh bahak kar baat gar bolūñ to huuñ māzūr maiñ
mujh ko hastī ne tirī āñkhoñ kī mastāna kiyā
bevafā.ī ne ye kis kī tujh ko samjhāyā 'hasan'
in dinoñ kyuuñ tū ne kam us taraf jaanā kiyā