udāsī ke daldal meñ girtā huā dil
bachā.ūñ maiñ kaise ye martā huā dil
maiñ us kī mohabbat meñ labrez dariyā
vo mujh meñ utar ke ubhartā huā dil
sitāre ḳhalā se abhī toḌ lā.ūñ
magar āsmāñ se ye Dartā huā dil
kabhī tum ne dekhā hai bolo batāo
kisī ā.īne meñ sañvartā huā dil
ayaañ us kī āñkhoñ kī shaffāfiyat meñ
dhule pāniyoñ sā nikhartā huā dil
aTaktā sambhaltā sambhal ke Thahartā
kaThin rāstoñ se guzartā huā dil
jatan laakh kar lo na aa.egā qaabū
hai ik mauj-e-sarkash biphartā huā dil