safar gumāñ hai rāsta ḳhayāl hai
chaloge mere saath kyā ḳhayāl hai
agar jahān-e-ḳhush-numā fareb hai
to sab fareb hai ḳhudā ḳhayāl hai
nazar ko aks jaan kī lalak hai aur
ġhazab ye hai ki aa.ina ḳhayāl hai
kisī nazar kī raushnī se munsalik
ye taaq meñ dharā diyā ḳhayāl hai
kabhī yahāñ vahāñ bhaTak ke rah gayā
kabhī ḳhayāl se milā ḳhayāl hai
mujhe bhī ab nahīñ hai is kī aarzū
use bhī ab kahāñ mirā ḳhayāl hai
dhuāñ havā meñ uḌ gayā 'shumā.ila'
suḳhan tirā bujhā huā ḳhayāl hai