yādoñ kā koī diip jalā.e to baat hai
vo chāñdnī hai paas bulā.e to baat hai
aa kar kisī bhī baaġh meñ mil jaa.e ḳhair hai
gorī agar na ghar pe bulā.e to baat hai
phir zikr chāhatoñ kā samā.at kā husn ho
phir dāstān-e-vasl sunā.e to baat hai
hai vaqt mehrbāñ to kare shād-kām dil
ye dūriyoñ ke zaḳhm bhulā.e to baat hai
rut hai milan kī us ke bhī raste meñ aa.e haiñ
taaza gulāb haath pe laa.e to baat hai
'āshiq' hai āshiqī kī zarūrī hai gar use
is āshiqī meñ ḳhud ko gañvā.e to baat hai