dar-ba-dar kī ḳhaak peshānī pe mal kar aa.egā

ghūm-phir kar rāsta phir mere hī ghar aa.egā

sāmne āñkhoñ ke phir yaḳh-basta manzar aa.egā

dhuup jam jā.egī āñgan meñ december aa.egā

shor kaisā apnī aahaT bhī na sun pāoge tum

is safar meñ aisā sannāTā to aksar aa.egā

jis kī ḳhātir shīsha-e-āvāz raushan hai bahut

us kī jānib se bhī ḳhāmoshī kā patthar aa.egā

sehn-e-dil meñ kab se tanhā.ī ke ḳheme nasb haiñ

ab na shāyad mausam-e-hañgāma-parvar aa.egā

zindagī bhar ham isī ummīd par chalte rahe

ab ke sahrā paar kar leñ to samundar aa.egā

munhadim ho jā.egī 'aḳhtar' fasīl-e-intishār

jab navāh-e-jāñ meñ vīrānī kā lashkar aa.egā