ek sūraj thā ki tāroñ ke gharāne se uThā
aañkh hairān hai kyā shaḳhs zamāne se uThā
kis se pūchhūñ tire aaqā kā pata ai rahvār
ye alam vo hai na ab tak kisī shāne se uThā
halqa-e-ḳhvāb ko hī gird-e-gulū kas Daalā
dast-e-qātil kā bhī ehsāñ na divāne se uThā
phir koī aks shuāoñ se na banñe paayā
kaisā mahtāb mire ā.ina-ḳhāne se uThā
kyā likhā thā sar-e-mahzar jise pahchānte hī
paas baiThā huā har dost bahāne se uThā