terī ḳhushbū kā patā kartī hai

mujh pe ehsān havā kartī hai

chuum kar phuul ko āhista se

mo.ajaza bād-e-sabā kartī hai

khol kar band-e-qabā gul ke havā

aaj ḳhushbū ko rihā kartī hai

abr baraste to ināyat us kī

shāḳh to sirf duā kartī hai

zindagī phir se fazā meñ raushan

mish.al-e-barg-e-hinā kartī hai

ham ne dekhī hai vo ujlī saa.at

raat jab sher kahā kartī hai

shab kī tanhā.ī meñ ab to akasr

guftugū tujh se rahā kartī hai

dil ko us raah pe chalnā hī nahīñ

jo mujhe tujh se judā kartī hai

zindagī merī thī lekin ab to

tere kahne meñ rahā kartī hai

us ne dekhā hī nahīñ varna ye aañkh

dil kā ahvāl kahā kartī hai

mus.haf-e-dil pe ajab rañgoñ meñ

ek tasvīr banā kartī hai

be-niyāz-e-kaf-e-dariyā añgusht

ret par naam likhā kartī hai

dekh tū aan ke chehra merā

ik nazar bhī tirī kyā kartī hai

zindagī bhar kī ye tāḳhīr apnī

rañj milne kā sivā kartī hai

shaam paḌte hī kisī shaḳhs kī yaad

kūcha-e-jāñ meñ sadā kartī hai

mas.ala jab bhī charāġhoñ kā uThā

faisla sirf havā kartī hai

mujh se bhī us kā hai vaisā hī sulūk

haal jo terā anā kartī hai

dukh huā kartā hai kuchh aur bayāñ

baat kuchh aur huā kartī hai