agarche tujh se bahut iḳhtilāf bhī na huā

magar ye dil tirī jānib se saaf bhī na huā

ta.alluqāt ke barzaḳh meñ hī rakhā mujh ko

vo mere haq meñ na thā aur ḳhilāf bhī na huā

ajab thā jurm-e-mohabbat ki jis pe dil ne mire

sazā bhī paa.ī nahīñ aur muaaf bhī na huā

malāmatoñ meñ kahāñ saañs le sakeñge vo log

ki jin se kū-e-jafā kā tavāf bhī na huā

ajab nahīñ hai ki dil par jamī milī kaa.ī

bahut dinoñ se to ye hauz saaf bhī na huā

havā-e-dahr hameñ kis liye bujhātī hai

hameñ to tujh se kabhī iḳhtilāf bhī na huā