rañg ḳhush-bū meñ agar hal ho jaa.e
vasl kā ḳhvāb mukammal ho jaa.e
chāñd kā chūmā huā surḳh gulāb
tītarī dekhe to pāgal ho jaa.e
maiñ añdheroñ ko ujālūñ aise
tīrgī aañkh kā kājal ho jaa.e
dosh par bārisheñ le ke ghūmeñ
maiñ havā aur vo bādal ho jaa.e
narm sabze pe zarā jhuk ke chale
shabnamī raat kā āñchal ho jaa.e
umr bhar thāme rahe ḳhush-bū ko
phuul kā haath magar shal ho jaa.e
chiḌiyā pattoñ meñ simaT kar so.e
peḌ yuuñ phaile ki jañgal ho jaa.e