rukī huī hai abhī tak bahār āñkhoñ meñ
shab-e-visāl kā jaise ḳhumār āñkhoñ meñ
miTā sakegī use gard-e-māh-o-sāl kahāñ
khiñchī huī hai jo tasvīr-e-yār āñkhoñ meñ
bas ek shab kī masāfat thī aur ab tak hai
mah o nujūm kā saarā ġhubār āñkhoñ meñ
hazār sāhib-e-raḳhsh-e-sabā-mizāj aa.e
basā huā hai vahī shah-savār āñkhoñ meñ
vo ek thā pa kiyā us ko jab tah-e-talvār
to baT gayā vahī chehra hazār āñkhoñ meñ