koshisheñ kar ke dil burā kiyā thā
us parinde ko jab rihā kiyā thā
kam aziyyat meñ jaan chhūT ga.ī
apne qātil se mashvara kiyā thā
ḳhaak se jitnā zahr jazb kiyā
apnī shāḳhoñ se rūnumā kiyā thā
maiñ ne ik din biThā ke bachchoñ ko
apne ajdād kā gilā kiyā thā
ham se sarzad huā thā kār-e-ḳhair
kyā batā.eñ ki ham ne kyā kiyā thā
vaise vo merī dastaras meñ hai
ehtiyātan muhāsara kiyā thā