aap izzat-ma.āb sach-much ke
log kam haiñ janāb sach-much ke
aap sab ko ḳharāb kahte haiñ
log kuchh haiñ ḳharāb sach-much ke
kuchh to parsañg yaad aate haiñ
the kathā meñ jo baab sach-much ke
apnī ta.abīr pā rahe haiñ jo
maiñ ne dekhe haiñ ḳhvāb sach-much ke
kuchh nazar aa rahe haiñ mahfil meñ
dekh lo māhtāb sach-much ke
titliyāñ phir vahīñ pe utreñgī
khilne dījiye gulāb sach-much ke
paas jin ke nahīñ hai ik misra.a
vo haiñ shā.er janāb sach-much ke