tire bīmār kī shāyad vidā-e-jān hai tan se

janāze kī vagarna vaañ hai tayyārī kā kyā baa.is

kahīñ vaqt-e-ḳhitāb ai yaar apne muñh se niklā thā

lagā kahne ki mujh meñ aap meñ yaarī kā kyā baa.is

marīz apne ko dekhā aah ḳhuuñ ālūda kyā kyā the

na thā gar dard dil meñ nāla-o-zārī kā kyā baa.is

nahīñ kuchh zor se letā koī dil do na do 'mamnūñ'

ye majbūrī kā kyā maujib ye nā-chārī kā kyā baa.is

mire siine meñ gar ātish-kada pinhāñ nahīñ zālim

fuġhān o aah se har dam sharar-bārī kā kyā baa.is

tasavvur chashm-e-ḳhūbāñ kā muqarrar tum ko rahtā hai

vagarna hazrat-e-dil itnī bīmārī kā kyā baa.is

huā jab kaam apnā kaam dil jab pūchhne aa.e

mujhe ġham khā chukā ab merī ġham-ḳhvārī kā kyā baa.is

ajab dīvāngī hai koī bhī yuuñ dil phañsātā hai

bahut daanā the tum 'mamnūñ' giraftārī kā kyā baa.is