har harf-e-ārzū pe kare thā vo yaar bahas

ek ek baat par thī use shab hazār bahas

laa.e hai khīñch ārzū-e-zaḳhm duur se

kaho vaar par na qātil ḳhanjar-guzār bahas

hairat-zadoñ ko mahfil-e-tasvīr kī tarah

ne hai shi.ār-e-ramz-o-kināya na kār-e-bahas

yā zikr-e-dost yā hai zabāñ par hadīs-e-ishq

juuñ ahl-e-madarsa nahīñ apnā shi.ār bahas

takrār se dil apnā jo māñgā kahā ki chal

miltā hai koī ye na abas baar baar bahas

kiije agar gila to taraf-dār yaar ho

aap hī lagā.e mujh se dil-e-be-qarār bahas

'mamnūñ' mujhe nasīhat-e-sā.ib ye yaad hai

tā sulh mumkin ast makun zīnhār bahas