tārīk ujāloñ meñ be-ḳhvāb nahīñ rahnā
us ziist ke dariyā ko pāyāb nahīñ rahnā
sarsabz jazīroñ kī ubhregī shabāhat bhī
us ziist samundar ko be-āb nahīñ rahnā
is hijr-e-musalsal kī aadat bhī kabhī hogī
hoñToñ pe sadā ġham kā zahrāb nahīñ rahnā
chhan chhan ke bahegā din bādal kī ridāoñ se
sūraj kī shuāoñ ko nāyāb nahīñ rahnā
us raat ke māthe par ubhreñge sitāre bhī
ye ḳhauf añdheroñ kā shādāb nahīñ rahnā