jis din se uTh ke ham tirī mahfil se aa.e haiñ
lagtā hai lākhoñ kos kī manzil se aa.e haiñ
mil kar gale ham apne hī qātil se aa.e haiñ
kyā saaf bach ke maut kī manzil se aa.e haiñ
rāheñ haiñ āshiqī kī nihāyat hī pur-ḳhatar
tere huzūr ham baḌī mushkil se aa.e haiñ
zulfoñ ke pech-o-ḳham meñ paḌeñ ham to kyā paḌeñ
ham tañg ḳhud hī apne masā.il se aa.e haiñ
bazm-e-butāñ meñ shaiḳh sukūñ ke ḳhayāl se
dāman chhuḌā ke zikr-o-navāfil se aa.e haiñ
ye haq parastiyāñ mirī marhūn-e-kufr haiñ
ye din to faiz-e-sohbat-e-bātil se aa.e haiñ
kuchh vahshiyoñ pe rañg bahāroñ se the 'alīm'
kuchh ehtimām tauq-o-salāsil se aa.e haiñ