adā-e-husn kī husn-e-adā kī baat hotī hai
vafā kī āzmā.ish par jafā kī baat hotī hai
ye kaisā daur-daura hai qalam-rū-e-mohabbat meñ
butoñ kā hukm chaltā hai ḳhudā kī baat hotī hai
koī gunjā.ish-e-faryād-o-shikva tak nahīñ baaqī
ḳhatā-e-be-gunāhī par sazā kī baat hotī hai
bhar aatā hai dil-e-mahrūm-e-pursish dard-mandī se
kahīñ bhī jab kisī dard-āshnā kī baat hotī hai
phir us ke ba.ad kaam aatā hai jazba Duub marne kā
talātum tak ḳhudā-o-nā-ḳhudā kī baat hotī hai
duāoñ ke bharose par bigaḌte kaam bante haiñ
davā be-sūd Thahre to duā kī baat hotī hai
'rishī' qānūn-e-qudrat hai amal-dārī taġhayyur kī
maqām-e-intihā par ibtidā kī baat hotī hai