dil sulagtā hai na ab yaad koī aatī hai
gard sī hai jo ḳhayāloñ pe jamī jaatī hai
duur peḌoñ se ulajhtī hai har āñdhī lekin
zard pattoñ ko mire ghar meñ uThā laatī hai
karne aatī hai munavvar dil har gosha-e-dard
chāñdnī shahar kī galiyoñ meñ bhaTak jaatī hai
dil kā barbād jahāñ jab bhī kabhī dekhtā huuñ
apne nākām irādoñ pe hañsī aatī hai
vo hai kis des meñ kis shahr meñ huuñ maiñ 'jamshed'
bas isī soch meñ har raat guzar jaatī hai