ab na de ilzām bedardī kā makkārī na kar
tū hī ḳhud ko jāñch le mujh se adākārī na kar
terī āñkhoñ se na bah nikle kahīñ merā lahū
vaar karnā hai tujhe to is qadar kaarī na kar
māntā huuñ maiñ ne tere zabt ko chheḌā magar
raah meñ yuuñ dekh kar izhār-e-be-zārī na kar
vaz.a-dārī se akele umr kaTtī hai kahīñ
apne hāthoñ zindagī ko is qadar bhārī na kar
rāsta chal dekh kar ye ḳhanjaroñ kā shahr hai
mujh se chāhe kuchh bhī kar le ḳhud se ġhaddārī na kar