mubārak ho ye tarz-e-be-ruḳhī ye hausla tujh ko
mujhe tū bhuul jaa.e itnī ḳhushiyāñ de ḳhudā tujh ko
hazāroñ aks lahrāte haiñ sat.h-e-āb-dīda par
kise nābūd kar denā hai tūfān-e-balā tujh ko
kahīñ ḳhuddāriyāñ tanhā.iyoñ se jheñp jaatī haiñ
mire kuchh sher paḌh lenā maza aa jā.egā tujh ko
vaqār-e-shaḳhsiyat meñ farq to paḌtā nahīñ lekin
asar-andāz hotā hai hamārā dekhnā tujh ko
ye kyā andāz hai 'ash.har' sharīfoñ se taḳhātub kā
sharaf baḳhshā na jā.egā kisī taqrīb kā tujh ko