havā sanke to ḳhāroñ ko baḌī taklīf hotī hai

mire ġham kī bahāroñ ko baḌī taklīf hotī hai

na chheḌ ai ham-nashīñ ab ziist ke māyūs naġhmoñ ko

ki ab barbat ke tāroñ ko baḌī taklīf hotī hai

mujhe ai kasrat-e-ālām bas itnī shikāyat hai

ki mere ġham-gusāroñ ko baḌī taklīf hotī hai

kaho maujoñ se lahrā kar na yuuñ palTeñ samundar se

ki bā-ġhairat kināroñ ko baḌī taklīf hotī hai

gale milte haiñ jab aapas meñ do bichhḌe hue sāthī

'adam' ham be-sahāroñ ko baḌī taklīf hotī hai