ḳhush huuñ ki zindagī ne koī kaam kar diyā

mujh ko supurd-e-gardish-e-ayyām kar diyā

saaqī siyāh-ḳhāna-e-hastī meñ dekhnā

raushan charāġh kis ne sar-e-shām kar diyā

pahle mire ḳhulūs ko dete rahe fareb

āḳhir mire ḳhulūs ko badnām kar diyā

kitnī duā.eñ duuñ tirī zulf-e-darāz ko

kitnā vasī.a silsila-e-dām kar diyā

vo chashm-e-mast kitnī ḳhabar-dār thī 'adam'

ḳhud hosh meñ rahī hameñ badnām kar diyā