lagtā hai tabāhī mirī qismat se lagī hai

ye kaun sī āñdhī mire andar se uThī hai

us baar ujāloñ ne mujhe gher liyā thā

is baar mirī raat mire saath chalī hai

kaise koī bastī mire andar utar aa.e

is baar to tanhā.ī mirī jaag rahī hai

kaise koī dariyā mire siine se guzar jaa.e

raste meñ anā kī mirī dīvār khaḌī hai

vīrān havelī kī tarah ab mire andar

bhaTkī huī rūhoñ kī sadā guuñj rahī hai

is baar añdherā mire nas nas meñ bharā hai

is baar charāġhoñ se shikāyat bhī baḌī hai