koshish zarā sī kī jo duāoñ ke saath saath

jalne lage charāġh havāoñ ke saath saath

nikle bahār oḌh ke kuchh ḳhushnumā badan

ḳhushbū bhī ham-safar hai qabāoñ ke saath saath

chehra-kushā huā hai koī gesuoñ ke beach

lagne lagī hai dhuup bhī chhāñv ke saath saath

shahroñ se muḳhtalif haiñ ye gaañv kī laḌkiyāñ

bhartī haiñ gāgareñ bhī adāoñ ke saath saath

yuuñ to maiñ is dayār se kuchh bhī na lā sakā

kuchh ḳhaak lag ke aa ga.ī paañv ke saath saath