ham un ko hāl-e-dil apnā sunā.e jaate haiñ

vo baiThe sunte haiñ aur muskurā.e jaate haiñ

vo bād-e-qatl bhī ḳhanjar lagā.e jaate haiñ

shahīd-e-nāz kī shaukat baḌhā.e jaate haiñ

ḳhamosh mahfil-e-a.adā meñ duur baiThe haiñ

ġhazab hai to bhī vo ā.ankhoñ meñ khaa.e jaate haiñ

ye infi.āl hai kis kis jafā-garī ke evaz

ki baat baat meñ vo muñh chhupā.e jaate haiñ

samajh hai gayā maiñ kahūñgā na kuchh ḳhudā kī qasam

sharāb aap mujhe kyuuñ pilā.e jaate haiñ

ye bazm-e-yār meñ hai qadr-o-manzilat 'raunaq'

ki aa.e koī vahāñ ham uThā.e jaate haiñ