ishq meñ lazzat-e-āzār nikal aatī hai
is bahāne se shab-e-tār nikal aatī hai
ham tire shahr se milte haiñ guzar jaate haiñ
tujh se milne meñ to talvār nikal aatī hai
ḳhvāb meñ toḌtā rahtā huuñ anā kī zanjīr
aañkh khultī hai to dīvār nikal aatī hai
jab bhī aatā hai koī rañg zamāne jaisā
kuchh na kuchh sūrat-e-inkār nikal aatī hai
jab bhī kartā huuñ ḳhamoshī ke havāle ḳhud ko
jaane kyā barsar-e-paikār nikal aatī hai