is tarah paikar-e-vafā ho jaa.eñ
ek duuje kā aasrā ho jaa.eñ
aao mil baiTh kar hañseñ boleñ
nahīñ ma.alūm kab judā ho jaa.eñ
dukh kisī ko ho ham taḌap uTTheñ
is qadar dard-āshnā ho jaa.eñ
ḳhushk dhartī chaTaḳh rahī ho jab
bharī barsāt kī ghaTā ho jaa.eñ
shahar jāmid hai log be-āvāz
aise māhaul meñ sadā ho jaa.eñ
dushmanoñ ke liye baneñ sarsar
dostoñ ke liye sabā ho jaa.eñ
jo hameñ dekhe dekh le ḳhud ko
sar-ba-sar sat.h-e-ā.īna ho jaa.eñ
aag dil kī agar bhaḌak uTThe
ye dhundalke sahar-numā ho jaa.eñ
rañg-e-ālam badal rahā hai 'hazīñ'
nahīñ ma.alūm kyā se kyā ho jaa.eñ