naqsh paanī pe banāyā kyuuñ thā

jab banāyā to miTāyā kyuuñ thā

ga.e vaqtoñ kā hai ab ronā kyuuñ

aa.e vaqtoñ ko gañvāyā kyuuñ thā

baiTh jaanā thā agar misl-e-ġhubār

sar pe tūfān uThāyā kyuuñ thā

merī manzil na kahīñ thī to mujhe

dasht-dar-dasht phirāyā kyuuñ thā

vo na hamdam thā na dam-sāz koī

hāl-e-dil us ko sunāyā kyuuñ thā

duur rahnā thā jab us ko 'mohsin'

mere nazdīk vo aayā kyuuñ thā