bechain jo rakhtī hai tumheñ chaah kisū kī
shāyad ki huī kārgar ab aah kisū kī
us chashm kā ġhamza jo kare qatl-e-do-ālam
goshe ko nigah ke nahīñ parvāh kisū kī
zulfoñ kī siyāhī meñ kuchh ik daam the apne
qismat ki huī raat vo tanḳhvāh kisū kī
kyā masraf-e-bejā se falak ko hai sarokār
vo shai kisū ko de jo ho dil-ḳhvāh kisū kī
duniyā se guzarnā hī ajab kuchh hai ki jis meñ
koī na kabhū rok sake raah kisū kī
chhīne se ġham-e-ishq shakebā.ī o ārām
ai dil ye paḌī luTtī hai buñgāh kisū kī