gar tujh meñ hai vafā to jafākār kaun hai
dildār tū huā to dil-āzār kaun hai
nālāñ huuñ muddatoñ se tire saa.e ke tale
pūchhā na ye kabhū pas-e-dīvār kaun hai
har shab sharāb-ḳhvār har ik din siyāh hai
āshufta zulf o laTpaTī dastār kaun hai
har aan dekhtā huuñ maiñ apne sanam ko shaiḳh
tere ḳhudā kā tālib-e-dīdār kaun hai
'saudā' ko jurm-e-ishq se karte haiñ aaj qatl
pahchāntā hai tū ye gunahgār kaun hai