apne dukh-dard kā afsāna banā laayā huuñ
ek ik zaḳhm ko chehre pe sajā laayā huuñ
dekh chehre kī ibārat ko khurachne ke liye
apne nāḳhun zarā kuchh aur baḌhā laayā huuñ
bevafā lauT ke aa dekh mirā jazba-e-ishq
āñsuoñ se tirī tasvīr banā laayā huuñ
maiñ ne ik shahr hamesha ke liye chhoḌ diyā
lekin us shahr ko ā.ankhoñ meñ basā laayā huuñ
itnī ġhaflat kī bhī niiñd achchhī nahīñ hotī hai
ai charāġho uTho dekho maiñ ziyā laayā huuñ