ghar meñ chāñdī ke koī sone ke dar rakh jā.egā
vo mire chashme meñ jab apnī nazar rakh jā.egā
qaid kar le jā.egā nīndoñ kī saarī kā.enāt
haañ magar palkoñ pe kuchh sachche guhar rakh jā.egā
saare dukh so jā.eñge lekin ik aisā ġham bhī hai
jo mire bistar pe sadiyoñ kā safar rakh jā.egā
jagmagāte jāgte rishtoñ ke sar kaT jā.eñge
jab koī ehsās ke pinjre meñ Dar rakh jā.egā
terī fankārī kā duniyā ḳhud karegī e'tirāf
sañg-rezoñ par tū jab shīshe ke ghar rakh jā.egā