ruuh ke zaḳhm bhar rahā hai kaun
mere andar utar rahā hai kaun
maiñ to zinda huuñ apne lahje meñ
lamha lamha ye mar rahā hai kaun
log shīsha-sifat nahīñ haiñ magar
reza reza bikhar rahā hai kaun
pattharoñ ke kaleje phaTne lage
sub.h-dam aah bhar rahā hai kaun
sab charāġhoñ ke sar salāmat haiñ
phir añdheroñ se Dar rahā hai kaun
dahriye sirf itnā batlā deñ
rañg phūloñ meñ bhar rahā hai kaun