agar dasht-e-talab se dasht-e-imkānī meñ aa jaate
mohabbat karne vaale dal pareshānī meñ aa jaate
hisār-e-sabr se jis roz maiñ bāhar nikal aatā
samundar ḳhud mirī ā.ankhoñ kī vīrānī meñ aa jaate
agar saa.e se jal jaane kā itnā ḳhauf thā to phir
sahar hote hī sūraj kī nigahbānī meñ aa jaate
junūñ kī azmatoñ se āshnā.ī hī na thī varna
jo the ahl-e-ḳhirad sab chāk-dāmānī meñ aa jaate
kisī zardār kī yuuñ nāz-bardārī se behtar thā
kisī ujḌe hue dil kī bayābānī meñ aa jaate