ujālā jab shab-e-zulmāt par utartā hai
vo harf harf mirī zaat par utartā hai
us ek rañg pe qurbān dil ke sab mausam
jo rañg shiddat-e-jazbāt par utartā hai
vo ḳhvāb-gāh kī raunaq vo chāñd jaisā badan
kabhī hayāt kabhī zaat par utartā hai
suḳhan-varān-e-kuhan us pe rashk karte haiñ
jo dard parcha-e-abyāt par utartā hai
kabhī-kabhār to suqrāt kī ridā ban kar
shu.ūr-e-fikr tilismāt par utartā hai