dil meñ hasrat koī bachī hī nahīñ
aag aisī lagī bujhī hī nahīñ
us ne jab ḳhud ko be-naqāb kiyā
phir kisī kī nazar uThī hī nahīñ
jaisā is baar khul ke ro.e ham
aisī bārish kabhī huī hī nahīñ
zindagī ko gale lagāte kyā
zindagī umr-bhar milī hī nahīñ
muntazir kab se chāñd chhat par hai
koī khiḌkī abhī khulī hī nahīñ
maiñ jise apnī zindagī samjhā
sach to ye hai vo merī thī hī nahīñ