vo aadat hai to aadat se kināre ho bhī saktā hai
magar is saarī koshish meñ ḳhasāra ho bhī saktā hai
raheñge saath phir bhī ham mohabbat mar ga.ī kyā ġham
ki masnūī tanaffus par guzārā ho bhī saktā hai
agar āñkheñ na bhar aa.eñ to dil muTThī meñ aa.egā
huā hai haal jo merā tumhārā ho bhī saktā hai
khulī āñkhoñ meñ Thahrā ḳhvāb kaise TuuT saktā hai
gumāñ ye zindagī bhar kā sahārā ho bhī saktā hai
jo itnī jagmagāhaT dekhte ho ās-pās apne
ye merī aañkh se TuuTā sitāra ho bhī saktā hai
hameñ hairat se mat dekho ab aisā kyā kiyā ham ne
zamīnī ishq hai sāhab dobāra ho bhī saktā hai