ḳhush-numā garche mad kā haala hai

tere kānoñ kā baalā baalā hai

dar-e-mai-ḳhāna kā gadā huuñ maiñ

be-piyāla mirā piyāla hai

dil-e-sad-pāra ye baġhal meñ na ho

dard dukh kā mire risāla hai

us nigah us mizha kī kuchh mat pūchh

ek barchhī hai ek bhālā hai

hai dam o hosh apnā be-hoshī

hosh jab se yahāñ sambhālā hai

kaise va.ada-ḳhilāf se 'joshish'

haq-ta.ālā ne kaam Daalā hai

mujh ko hai intizār o betābī

us ko hiila hai aur havāla hai