chashm se ġhāfil na huā chāhiye
us ke muqābil na huā chāhiye
dil kā zarar jaan kā nuqsān hai
ab kahīñ maa.il na huā chāhiye
hai but-e-ḳhuñ-ḳhār bahut tund-ḳhū
bosa ke saa.il na huā chāhiye
aql ko dil chhoḌ rah-e-ishq meñ
hamrah-e-kāhil na huā chāhiye
roz tanazzul meñ hai māh-e-tamām
dahr meñ kāmil na huā chāhiye
yaar kamar bāñdhiye insāf par
bar-sar-e-bātil na huā chāhiye
qatl ke qābil hai ye 'joshish' tirā
ġhair ke qātil na huā chāhiye