dayār-e-shab kā muqaddar zarūr chamkegā

yahīñ kahīñ se charāġhoñ kā nuur chamkegā

kahāñ huuñ maiñ koī muusā ki ik sadā pe mirī

vo nuur phir se sar-e-koh-e-tūr chamkegā

tire jamāl kā nashsha sharāb jaisā hai

hamārī āñkhoñ se us kā surūr chamkegā

bharam jo pyaas kā rakkhegā āḳhirī dam tak

usī ke haath meñ jām-e-tuhūr chamkegā

ye kah ke daar pe ḳhud ko chaḌhā diyā maiñ ne

ki daar par bhī sar-e-be-qusūr chamkegā

luTe hue haiñ magar ham abhī nahīñ māyūs

hamāre taaj meñ phir koh-e-nūr chamkegā

talāsh kartā hai mujh musht-e-ḳhāk meñ tū abas

ġhurūr hogā jabhī to ġhurūr chamkegā

matā-e-fan se navāzā gayā hai tujh ko 'farāġh'

isī se naam tirā duur duur chamkegā