zikr us raat se hai vābasta

jo tirī zaat se hai vābasta

jiit merī faqat mirī to nahīñ

ye tirī maat se hai vābasta

aañkh se le ke dil talak kā safar

inkishāfāt se hai vābasta

koī to hai jo terī āñkhoñ ke

in ishārāt se hai vābasta

mere ash.ār meñ tirā paikar

isti.ārāt se hai vābasta

fikr ab tak tirī kahānī ke

iqtibāsāt se hai vābasta

thiiñ mirī aañkh meñ kabhī kirneñ

ab jo barsāt se hai vābasta

hijr ke moḌ par jamī hai nazar

aur lamhāt se hai vābasta

kis kī aamad hai aaj jo 'zaryāb'

intizāmāt se hai vābasta