dil mirā muztar bahut paiham rahā
zindagī meñ jab musalsal ġham rahā
mehrbāñ thā kuchh tasavvur is tarah
hijr meñ bhī vasl kā aalam rahā
manzileñ us kā muqaddar ban ga.iiñ
azm jis insān kā mohkam rahā
kis taraf le aa.ī hai ye zindagī
vaqt ham par mehrbāñ kam-kam rahā
phir kisī ke talḳh lahje ke sabab
ye charāġh-e-ārzū maddham rahā
qahqahoñ ke saath aañsū the ravāñ
raat vahshat meñ ajab aalam rahā
jab bhī dekhā aa.ina 'zaryāb' ne
aks maazī kā bahut maddham rahā