in ghaTāoñ meñ ujāle kā baserā hī sahī
ḳhair agar aap ba-zid haiñ to saverā hī sahī
ai ġham-e-zīst bulātī haiñ mahaktī zulfeñ
aaj kī raat ye pur-nūr añdherā hī sahī
dil meñ jo aag lagī hai vo kahāñ bujhtī hai
raah shādāb sahī abr ghanerā hī sahī
hoshiyār ahl-e-ḳhirad ḳhāk-nashīñ aa pahuñche
aap ke zo.am kā aflāk pe Derā hī sahī
tū pareshān na ho ḳhāliq-e-firdaus-e-barīñ
ye jahannam ye jahāñ aaj se merā hī sahī
kitnī yādeñ haiñ ki nāgin kī tarah Dastī haiñ
'nūr' un galiyoñ kā ik āḳhirī pherā hī sahī