sañg-e-dushnām ko gauhar jaanā
ham ne dushman ko bhī dilbar jaanā
nañg-e-ulfat hī rahā parvāna
us ko aatā hai faqat mar jaanā
pūchh lenā dar-o-dīvār kā haal
ai bagūlo jo mire ghar jaanā
sar qalam karte rahe zulm ke haath
yaar logoñ ne muqaddar jaanā
kam-nigāhī ne Duboyā ham ko
ek qatre ko samundar jaanā
tesha-bardār ko farhād kahā
ā.īna-gar ko sikandar jaanā
ham haqīqat meñ the kohsār magar
ḳhud ko zarroñ se bhī kam-tar jaanā