har ek shab yūñhī dekheñgī sū-e-dar āñkheñ

tujhe gañvā ke na so.eñgī umr-bhar āñkheñ

tulū-e-sub.h se pahle hī bujh na jaa.eñ kahīñ

ye dasht-e-shab meñ sitāroñ kī ham-safar āñkheñ

sitam ye kam to nahīñ dil giraftagī ke liye

maiñ shahr bhar meñ akelā idhar-udhar āñkheñ

shumār us kī saḳhāvat kā kyā kareñ ki vo shaḳhs

charāġh bāñTtā phirtā hai chhīn kar āñkheñ

maiñ zaḳhm zaḳhm huā jab to mujh pe bhed khulā

ki pattharoñ ko samajhtī rahīñ guhar āñkheñ

maiñ apne ashk sañbhālūñgā kab talak 'mohsin'

zamāna sañg-ba-kaf hai to shīshagar āñkheñ