us ne jab ḳhusrav-e-parvez kī dhamkī dī hai

maiñ ne bhī ishq-e-balā-ḳhez kī dhamkī dī hai

maiñ jo rakhtā huuñ use dekh ke bhī hosh bahāl

us kī āñkhoñ ne mai-e-tez kī dhamkī dī hai

vo jo dil dene se inkār kiyā kartā hai

maiñ ne ik lams-e-dil-āvez kī dhamkī dī hai

paḌ ga.ī lazzat-e-āzār kī aadat jo mujhe

tund-ḳhū ne kaf-e-gul-rez kī dhamkī dī hai

maiñ ne jab jab bhī kiyā us se mazālim kā gila

us ne kuchh aur bhī mahmez kī dhamkī dī hai