shāhid-e-ġhaib huvaidā na huā thā so huā

husn par aap ne shaidā na huā thā so huā

ġhamza-e-shoḳh-e-siyah-mast tirā mizhgāñ se

qatl-e-āshiq pe saf-ārā na huā thā so huā

hañs ke vo ġhuncha-dahan merī jigar-ḳhvārī par

kah diyā terā dilāsā na huā thā so huā

rishta-e-sāf nigah meñ ho musalsal aañsū

sīna-e-yār meñ maalā na huā thā so huā

sar-e-saudā pe tire sher-e-rasā se 'āgāh'

silsila hashr kā barpā na huā thā so huā