shāne kā bahut ḳhūn-e-jigar jaa.e hai pyāre
tab zulf kahīñ tā-ba-kamar jaa.e hai pyāre
jis din koī ġham mujh pe guzar jaa.e hai pyāre
chehra terā us roz nikhar jaa.e hai pyāre
ik ghar bhī salāmat nahīñ ab shahr-e-vafā meñ
to aag lagāne ko kidhar jaa.e hai pyāre
rahne de jafāoñ kī kaḌī dhuup meñ mujh ko
saa.e meñ to har shaḳhs Thahar jaa.e hai pyāre
vo baat zarā sī jise kahte haiñ ġham-e-dil
samjhāne meñ ik umr guzār jaa.e hai pyāre
har-chand koī naam nahīñ merī ġhazal meñ
terī hī taraf sab kī nazar jaa.e pyāre